தேவையான பொருட்கள்:

பாஸ்மதி அரிசி - 4 கப்

சிக்கன் - 3/4 கிலோ

பெரிய வெங்காயம் - 2

இஞ்சி பூண்டு விழுது - 3 மேசைக்கரண்டி

பச்சை மிளகாய் - 6

காஷ்மீர் மிளகாய் தூள் - 3 தேக்கரண்டி

கரம் மசாலா தூள் - ஒரு தேக்கரண்டி

தயிர் - 2 மேசைக்கரண்டி

கொத்தமல்லி இலை - அரை கட்டு

புதினா - அரை கட்டு

கறிவேப்பிலை - சிறிதளவு

முந்திரிபருப்பு - 10

தேங்காய் பால் - 2 கப்

எலுமிச்சம் பழம் - ஒன்று

சோம்பு - சிறிதளவு

பிரிஞ்சி இலை - 3

ஏலக்காய் - 6

கிராம்பு - 6

பட்டை - 2 துண்டு

நெய் - 3 மேசைக்கரண்டி

கடுகு எண்ணெய் - ஒரு தேக்கரண்டி

கேசரி பவுடர் - சிறிதளவு

எண்ணெய் - தேவையான அளவு

உப்பு - தேவையான அளவு

செய்முறை:

ஒரு பாத்திரத்தில் கடுகு எண்ணெய், தயிர், 2 தேக்கரண்டி காஷ்மீர் மிளகாய் தூள் ஆகியவற்றை சேர்த்து நன்றாக கலக்கவும். இதில் ஒரு மேசைக்கரண்டி இஞ்சி பூண்டு விழுது, அரை தேக்கரண்டி கரம் மசாலா தூள், சிக்கனுக்கு தேவையான அளவு உப்பு, கேசரி பவுடர் சேர்த்து கிளறி அரை மணி நேரம் ஊற வைக்கவும்.

ஊற வைத்த சிக்கனை எண்ணெயில் பொரித்து எடுக்கவும். ( டீப் ப்ரை பண்ண வேண்டாம்)

ஏலக்காய், கிராம்பு, பட்டை ஆகியவற்றை மிக்ஸியில் பொடித்து வைத்து கொள்ளவும். பெரிய வெங்காயத்தை நீளவாக்கில் நறுக்கிவைத்துக் கொள்ளவும். தக்காளியை பொடியாக நறுக்கி வைத்துக் கொள்ளவும்.அரிசியை அரை மணி நேரம் ஊற வைக்கவும்.

பாத்திரத்தில் எண்ணெய் மற்றும் பாதி நெய் சேர்த்து சோம்பு, பிரிஞ்சி இலை, ஏலக்காய், கிராம்பு, பட்டை பொடி, முந்திரி பருப்பு ஆகியவற்றை சேர்த்து வதக்கவும். பிறகு பெரிய வெங்காயத்தை சேர்த்து பொன்னிறமாகும் வரை வதக்கவும்.

இதில் இஞ்சி பூண்டு விழுது சேர்த்து பச்சை வாசம் போகும் வரை வதக்கவும். பிறகு கொத்தமல்லி இலை, புதினா, பச்சை மிளகாய் சேர்த்து வதக்கவும். தக்காளி சேர்த்து வதக்கவும். இதில் மீதமுள்ள மிளகாய் தூள் மற்றும் கரம் மசாலா தூளை சேர்த்து கொள்ளவும். இந்த மசாலாவிற்கு தேவையான அளவு உப்பை சேர்த்து கொள்ளவும். தக்காளி வதங்கியவுடன் சிக்கனை சேர்த்து கிளறி ஐந்து நிமிடம் சிம்மில் வைத்து மூடி வைக்கவும்.

இந்த நேரத்தில் ஊற வைத்த அரிசியை தண்ணீர் நீக்கி கடாயில் எண்ணெய் ஊற்றி ஈரப்பதம் போகும் வரை வறுக்கவும்.(அரிசி ஊற வைத்த தண்ணீரை கீழே ஊற்ற வேண்டாம். பிரியாணிக்கு இந்த தண்ணீரை பயன்படுத்தி கொள்ளவும்)

வறுத்த அரிசியை சிக்கன் கலவையுடன் சேர்த்து கிளறி எலுமிச்சம் பழம் சாறை ஊற்றி தேங்காய் பால் மற்றும் 4 கப் தண்ணீர் தேவையான அளவு உப்பு நெய் சேர்த்து கிளறி கொதிக்க விடவும்.(ஒரு கப் அரிசிக்கு ஒன்றரை கப் தண்ணீர்)

5 நிமிடம் கழித்து கிளறி விட்டு பார்க்கவும். தண்ணீர் மேலே இல்லாமல் இருந்தால் அலுமினிய ஃபாயில் பேப்பரை போட்டு நன்கு மூடி சிம்மில் 10 நிமிடம் வைக்கவும்.

10 நிமிடம் கழித்து கிளறி பாருங்கள் தண்ணீர் இல்லாமல் இருந்தால் இறக்கி விடவும். சுவையான சிக்கன் பிரியாணி ரெடி

குறிப்புகள்: