தேவையான பொருட்கள்:

முருங்கைக் கீரை - ஒரு கட்டு

பாசிப்பருப்பு - 1/2 கப்

முருங்கைக்காய் - 2

உப்பு - தேவையான அளவு

வறுத்து அரைக்க:

மிளகு - 1 1/2 தேக்கரண்டி

சீரகம் - 1 1/2 தேக்கரண்டி

துவரம் பருப்பு - 1 1/2 தேக்கரண்டி

பச்சரிசி - 1 தேக்கரண்டி

சிவப்பு மிளகாய் - 5 அல்லது 6

தேங்காய் துருவல் - 3 தேக்கரண்டி

தாளிக்க:

எண்ணெய் - 1 தேக்கரண்டி

கடுகு, உளுத்தம்பருப்பு - 1 தேக்கரண்டி

செய்முறை:

முருங்கைக் கீரையை ஆய்ந்து, சுத்தம் செய்து கொள்ளவும்.

வறுத்து அரைக்க வேண்டியவற்றை வெறும் வாணலியில் வறுக்கவும். துவரம் பருப்பை சிவக்க வறுக்கவும். பச்சரிசியை பொரியவிடவும்.

மிளகாயை வறுக்கும்போது, சிறிது எண்ணெய் சேர்த்து வறுக்கலாம். வறுத்த அனைத்தையும் சேர்த்து ஆறவிடவும்.

ஆறியதும் அதனுடன் உப்பு சேர்த்து மிக்ஸியில் விழுதாக அரைத்துக் கொள்ளவும்.

முருங்கைக்காயை சிறு துண்டுகளாக நறுக்கி, தனியாக வேகவைத்து எடுத்துக் கொள்ளவும். விரும்பினால், கத்தரிக்காயும் சேர்க்கலாம்.

குக்கரில் பாசிப்பருப்புடன், சுத்தம் செய்த முருங்கைக் கீரையை சேர்த்து வேக வைக்கவும். வெந்ததும் கீரை பருப்பு கலவையுடன், அரைத்து வைத்திருக்கும் விழுது, வேகவைத்த முருங்கைக்காய் சேர்த்து கிளறி, தேவையான அளவு தண்ணீரும் சேர்த்து ஒரு கொதிவிடவும். கடைசியாக கடுகு, உளுத்தம் பருப்பு, தாளித்து சேர்த்து இறக்கி பரிமாறவும்.

குறிப்புகள்:

சூடான சாதத்துடன், கலப்பருப்பு, நெய் சேர்த்து, குழம்பு ஊற்றி சாப்பிடலாம். தொட்டுக் கொள்ள கூழ் வடகம் பொருத்தமாக இருக்கும்.