தேவையான பொருட்கள்:

தயார் செய்த மாவு - 300 கிராம்

கோழி (எலும்பு எடுத்தது) - கால் கிலோ

வெங்காயம் - பாதி

வெள்ளை மிளகு தூள் - 1 1/2 தேக்கரண்டி

அஜினோமோட்டோ - ஒரு சிட்டிகை

முட்டை - இரண்டு

உப்பு - தேவையான அளவு

செய்முறை:

முதலில் இறைச்சியை கழுவிக் கொள்ளவும். வெங்காயத்தை அதனுடன் சேர்த்து கொரகொரப்பாக மிக்ஸியில் அரைத்துக் கொள்ளவும்.

அதனுடன் மிளகுதூள், உப்பு, அஜினோமோட்டோ, முட்டை(ஒரு முட்டையின் மஞ்சள் கருவை மட்டும் தனியே எடுத்து வைக்கவும்) இவைகளை எல்லாம் சேர்த்து பிசைந்துக்கொள்ளவும்.

பின்பு தயார் செய்த மாவை தேய்த்துக் கொள்ளவும். ஒரு டம்ளரால் வட்டமாக வெட்டிக் கொள்ளவும்,

பின்பு அந்த வட்டத்தின் நடுவே இறைச்சி கலவையை வைத்து அதன் மேல் இன்னொரு வட்டத்தை வைத்து மூடி விரலால் ஓரங்களை அழுத்தி மூடவும்.

இவைகளை 220 டிகிரி ஃபாரன்ஹீட்டில் 30 நிமிடங்கள் அவனில் வைக்கவும்.

20 நிமிடம் வெந்த பின்பு, வெளியே எடுத்து மஞ்சள் கருவை நன்றாக கலக்கி பப்ஸ் மேல் எல்லா இடங்களிலும் பரவினாற் போல் தடவி மீண்டும் அவனில் வைக்கவும். சிவந்தபின்பு வெளியே எடுத்து சூடாக பரிமாறவும்.

குறிப்புகள்:

பப்ஸ் செய்முறை ஏற்கனவே அறுசுவையில் இடம் பெற்றிருக்கிறது, அந்த பதத்தில் மாவு தயார் செய்துக் கொள்ளவும்.