தேவையான பொருட்கள்:

ஆட்டிறைச்சி - 300 கிராம்

கத்திரிக்காய் - 5

உருளைக்கிழங்கு - 4

கேரட் - 3

பச்சை மிளகாய் - 5

தக்காளி - 3

பெரிய வெங்காயம் - 1

துவரம் பருப்பு - 200 கிராம்

கறி மசாலா - 1 மேசைக்கரண்டி + 1 தேக்கரண்டி

இஞ்சி பூண்டு விழுது - 2 மேசைக்கரண்டி

தேங்காய் பூ - 1 கப்

புளி - எலுமிச்சை பழ அளவு

மிளகாய் தூள் - 3/4 மேசைக்கரண்டி

மஞ்சள் தூள் - 1/2 தேக்கரண்டி

கறிவேப்பிலை - 2 கொத்து

ஏலக்காய் - 4

கிராம்பு - 2

பட்டை - பாதி

மல்லி தூள் - 1/4 கப்

எண்ணெய் - 1/4 கப்

உப்பு - தேவையான அளவு

செய்முறை:

கத்திரிக்காய், உருளைக்கிழங்கு இரண்டையும் நான்கு துண்டுகளாக நறுக்கவும். காரட்டை வட்டமாக நறுக்கவும். வெங்காயத்தை நீளவாக்கில் மெல்லிதாக நறுக்கவும். பச்சை மிளகாயை கீறி வைக்கவும். தக்காளியை 4 துண்டுகளாக நறுக்கவும்.

தேங்காயை அரைத்து விழுதாக எடுத்துக் கொள்ளவும். மாங்காய் கிடைக்கும் காலங்களில் மற்ற காய்களுடன் மாங்காயையும் துண்டுகளாக்கி சேர்த்துக் கொள்ளவும். தாளிச்சாவில் மாங்காய் சேர்த்தால் நல்ல சுவையுடன் இருக்கும். கறியை சற்று பெரிய துண்டங்களாக வெட்டிக் கொள்ளவும்.

குக்கரில் எண்ணெய் ஊற்றி காய்ந்ததும் ஏலக்காய், கிராம்பு, பட்டை போட்டுப் பொரிக்கவும்.

பிறகு நறுக்கின வெங்காயம் போட்டு அரை நிமிடம் வதக்கி, அத்துடன் இஞ்சி பூண்டு விழுது சேர்த்து பச்சை வாசனை போகும் வரை வதக்கவும்.

அதனுடன் மஞ்சள் தூள், மிளகாய் தூள் போட்டு மேலும் அரை நிமிடம் வதக்கவும்.

பின்னர் நறுக்கி வைத்துள்ள கறித் துண்டங்களைப் போட்டு மசாலாவுடன் சேரும்படி பிரட்டி விடவும்.

பருப்பை கழுவி சுத்தம் செய்து அத்துடன் சேர்க்கவும். நறுக்கிய பாதியளவு தக்காளியை போட்டு கிளறவும்.

பிறகு மூன்றரை கப் தண்ணீர் ஊற்றி உப்பு, கொத்தமல்லி போட்டு கிளறி விடவும். (கறி, பருப்பு இரண்டும் வேகும் அளவு தண்ணீர் சேர்க்கவும்.)

குக்கரை மூடி வைத்து, அடுப்பை சிம்மில் வைத்து 3 விசில் வரும் வரை வேக விடவும்.

3 விசில் வந்த பிறகு குக்கரை இறக்கிவிடவும். கறி நன்கு வெந்திருக்க வேண்டும்.

இப்போது அடுப்பில் ஒரு பாத்திரத்தில் காய்கறிகளை போட்டு அதில் கறி மசாலா, மல்லித் தூள் சேர்க்கவும்.

அதனுடன் வேக வைத்த கறி மசாலாவை சேர்த்து ஒரு கப் தண்ணீர் ஊற்றி கிளறி, பின்னர் மூடி அடுப்பில் வைத்து சுமார் 8 நிமிடங்கள் கொதிக்க விடவும்.

புளியுடன் தண்ணீர் ஊற்றி ஒரு கப் அளவிற்கு திக்கான புளிக்கரைச்சலாக எடுத்துக் கொள்ளவும். புளி கரைசலுடன் அரைத்த தேங்காயை சேர்த்து கரைத்துக் கொள்ளவும்.

காய் நன்கு வெந்தவுடன் கரைத்து வைத்துள்ள புளி கரைசலை குழம்பில் சேர்க்கவும்.

ஒரு கொதி வந்தவுடன் கறிவேப்பிலை சேர்த்து இறக்கி விடவும். கறிவேப்பிலையை கொத்தாக போடவும்.

சுவையான தாளிச்சா ரெடி. நெய் சோறு அல்லது பிரியாணியை தயாராக வைத்து இருக்கின்றீர்களா? சேர்த்து சாப்பிட்டுப் பாருங்கள்.

இஸ்லாமிய சமையலில் நீண்ட அனுபவம் கொண்ட திருமதி. பைரோஜா ஜமால் அவர்களின் தயாரிப்பு இது. இவரது குடும்பத்தினர் பலரும் சமையல் துறையில் வல்லுனர்களாக வெளிநாடுகளில் இருக்கின்றனர். இவரது தந்தை சிங்கப்பூரில் உணவு விடுதி நடத்தி வந்தவர். குடும்பப் பின்னணி, வளர்ந்த சூழல் அனைத்தும் இவரது சமையல் திறனை செம்மைப் படுத்தியுள்ளன.

குறிப்புகள்: