தேவையான பொருட்கள்:

பாஸ்மதி அரிசி(ஊறவைத்தது) - 2 கப்

காரட் நறுக்கியது - 200 கிராம்

பீன்ஸ் நறுக்கியது - 200 கிராம்

கறிமிளகாய்(குடைமிளகாய்) நறுக்கியது - 200 கிராம்

பச்சைமிளகாய் கீறியது - 8

சோயா சோஸ் - 2 மேசைக்கரண்டி

லீக்ஸ் - ஒரு பிடி

செலரி - ஒரு பிடி

பட்டர் - தேவையானளவு

எண்ணெய் - தேவையான அளவு

உப்பு - தேவையான அளவு

வெங்காயம் நறுக்கியது - ஒரு கப் (200 கிராம்)

செய்முறை:

பாஸ்மதி அரிசியை கழுவி துப்பிரவு செய்யவும். பின்பு அடுப்பில் தாட்சியை(வாணலியை) வைத்து சூடாக்கியபின்பு அதில் பட்டர், கழுவி துப்பிரவு செய்த பாஸ்மதி அரிசி ஆகியவற்றை போட்டு வறுக்கவும்.

அதன் பின்பு அடுப்பிலிருந்து தாட்சியை இறக்கி வறுத்த அரிசியை வேறு ஒரு பாத்திரத்தில் போடவும்.

பின்பு அடுப்பில் பாத்திரம் ஒன்றை வைத்து அதில் முக்கால் பகுதி தண்ணீர் விட்டு அதனை கொதிக்க விடவும்.

அடுப்பிலுள்ள தண்ணீர் கொதித்ததும் அதில் கழுவி வறுத்த அரிசியை போட்டு அவியவிடவும்.

அரிசி அவிந்து சோறு(சாதம்) ஆகியதும் அதிலுள்ள கஞ்சியை வடித்து விட்டு அடுப்பிலிருந்து இறக்கி வேறொரு பாத்திரத்தில் போட்டு ஆற வைக்கவும்.

அதன் பின்பு அடுப்பில் தாட்சியை(வாணலியை) வைத்து சூடாக்கிய பின்பு அதில் எண்ணெய் விட்டு சூடாக்கி அதில் வெங்காயம், பச்சைமிளகாய் போட்டு பொன்னிறமாக வதக்கவும்.

பொன்னிறமாக வதக்கிய பின்பு அதில் நறுக்கிய பீன்ஸ் போட்டு வதக்கவும்.

பீன்ஸ் வதக்கிய பின்பு அதில் நறுக்கிய காரட் போட்டு வதக்கவும். காரட் வதக்கியதில் நறுக்கிய கறிமிளகாய் (குடைமிளகாய்) போட்டு வதக்கவும்.

கறிமிளகாய்(குடைமிளகாய்) வதக்கிய பின்பு அதில் சோயாசாஸ், லீக்ஸ், செலரி, உப்பு ஆகியவற்றையும் போட்டு பாத்திரத்தை டைட்டாக மூடி மெல்லிய நெருப்பில்(தீயில்) வேகவிடவும் .

வெந்த பின்பு இதனுடன் சோற்றை(சாதத்தை) போட்டு நன்றாக கலந்தால் தாளிப்போ அல்லது கரம்மசாலாவோ இல்லாத சைனீஸ்ஃப்ரைட் ரைஸ் தயாராகிவிடும்.

பின்பு ஒரு தட்டில் சைனீஸ் ஃப்ரைட் ரைஸை வைத்து இதனுடன் கறிவேப்பிலை துவையல் அல்லது இஞ்சித்துவையல் அல்லது வேறு ஏதாவது துவையலுடன் பரிமாறவும்.

குறிப்புகள்:

சைனீஸ் ஃப்ரைட் ரைஸ் சுவையானது. கார்போஹைட்ரேட், மினரல், கரோட்டீன்,

வைட்டமின்(ஏ,பி,சி), பொட்டாஷியம், பாஸ்பரஸ், கால்சியம், இரும்பு, மக்னிசீயம் போன்ற பல சத்துகள் அடங்கியது சீன மக்கள் விரும்பி உண்ணும் உணவாகும். ஆகவே இதனை செய்து பார்த்து இதன் சுவையை அறிவதுடன் இதில் காணப்படும் சத்துகளையும் பெற்றுக்கொள்ளலாம். எச்சரிக்கை - இருதய நோயாளர் வைத்தியரின் ஆலோசனைப்படி உண்ணவும்.